नवलपुर, १० कार्तिक । पूर्व-पश्चिम राजमार्गअन्तर्गत नवलपरासी मध्यविन्दु नगरपालिका–११ अरुणखोलामा आज बिहान ५ बजे बस दुर्घटना हुँदा ११ जना घाइते भएका छन् । बर्दियाबाट काठमाडौंका लागि छुटेको ना६ख ८४३९ नं को बस सडक छेउमा रोकिराखेको ना६ख ५९२ नं को ट्रकमा ठोक्किएर दुर्घटना भएको हो ।
दुर्घटनमा परी घाइते भएका ११ जनाको नयाँ मेडिकल कलेज भरतपुरमा उपचार भइरहेको जिल्ला प्रहरी कार्यालय नवलपरासी पूर्वका सूचना अधिकृत लीलाराज लामिछानेले जानकारी दिए । घाइतेको नाम, ठेगाना खुल्न बाँकी रहेको उनले बताए ।
गए राति भएको अर्को सवारी दुर्घटनामा एक जना घाइते भएका छन् । देवचुली नगरपालिका–१६ स्थित राजमार्गमा ना४२प ५०९५ नं को मोटरसाइकललाई नम्बर नखुलेको ट्रकले ठक्कर दिँदा देवचुली–१६ का ४५ वर्षीय सुमन अधिकारी घाइते भएका छन् । गम्भीर घाइते भएका उनको भरतपुरमा उपचार भइरहेको प्रहरीले जनाएको छ । अरुणखोलामा यसअघि गत कार्तिक ४ गते पनि बस दुर्घटना भएको थियो । (रासस)